મમ્મી રોજ સવારે ઑફિસે જાય છે.
મમ્મી રોજ સવારે ઉતાવળમાં હોય છે.
મમ્મી જતી વખતે મને ખૂબ વહાલ કરે છે,
બકી ભરી મને કહે છે :
“મારો ડાહ્યો દીકરો છે ને ! તોફાન નહીં કરતો,
યમુનાબાઈને પજવતો નહિ;”
અને મને એક ચોકલેટ આપે છે.
હું યમુનાને પજવતો નથી.
બાઈ મને વાર્તા કહે છે –
વાંદરાની, હનુમાનની,
રાક્ષસની, રામની, રાવણની, સીતાની…..
સાંજે મમ્મી ખૂબ થાકીને ઘરે આવે છે,
અને વળી પર્સમાંથી એક ચોકલેટ આપે છે.
હું એને પૂછું છું :
“રાવણ સીતાને શા માટે ઉપાડી જાય છે મમ્મી ?”
મમ્મી કહે :
“હું ખૂબ થાકી ગઈ છું આજે.
રવિવારે તને રાવણની વાત કહીશ
– વિપિન પરીખ
હિમાંશુ પરભુભાઇ મિસ્ત્રી | Himanshu Mistry 